انا ترددت كتير قبل ما اكتب التجربه , بس علشان انا عارف مدي اهمية الموضوع و مدي تأثيره كان لازم ان انا اكتب تجربتي عنه
( العادة السرية ) اسمها بيوصفها ( عادة ) لان الي بيعملها بيتعود عليها و بيفضل يعملها باستمرار , ( السرية ) لان مفيش حد بيعملها الا لما بيبقي لوحده و من هنا سميت بالعادة السرية .
طيب انا هتكلم في تجربتي معاكم علي اجزاء , هنبدء بازاي اتعرفت علي العادة السرية , ثم ازاي تطور الموضوع معايا , ثم ازاي اثرت العادة السريه عليا , ثم ازاي قدرت الحمدلله ان انا اتخلص من العادة السرية .
اولا : بدايتي مع العادة السرية
مكنتش اعرف ايه هيا العاده السريه ولا اي حاجه عن الجنس الا بعد لما دخلت المرحله الاعداديه , نقدر نقول قبل كده كنت ابيض تماما , الموضوع بدء معايا من خلال ( اصدقاء السوء ) , اصدقاء مع بعض في المدرسه , بعد المدرسه بنخرج بنروح نقعد في سايبر محل فيه كزا كمبيوتر , كنا المفروض بنروح نلعب العاب كمبيوتر GTA , العاب عربيات , ريد اليرت , لحد اما في مره لقيت كزا واحد من اصدقائي فاتحين ( موقع اباحي ) ساعتها انا كنت مصدوم جدا من الي شايفه و من المنظر , وكرد فعل تلقائي اعترضت عليهم و ده لان والدتي مربياني تربيه محترمه مع العلم ( والدي مسافر للعمل في الخارج ) , المهم لقيت رد فعل من اصدقائي انت شكلك عيل تعبان و انت خواف و بتاع , و من هنا بدأت ان انا اندرج معاهم في الموضوع علشان اثبت ليهم و لنفسي ان انا مش خواف ( وده اكبر خطأ وقعت فيه ) , و بدأت ان انا كل ما نروح محل الكمبيوتر اتفرج معاهم علي صور اباحيه و افلام اباحيه و كنت برضه ساعتها معرفش ايه العاده السريه مجرد ان انا كنت بحس باستثاره من المشاهده .
اول مره اجرب الموضوع كان فضول بالنسبه ليا و حب استطلاع عاوز اعرف ايه هيا ( العادة السرية ) و زي ما وضحت سرية فكنت بختلي بنفسي و بجرب الموضوع .
ثانيا : تطور ( العاده السرية )
الموضوع تطور معايا من حب استطلاع و فضول الي ان مبقاش يعدي يوم الا لما اقوم بالعادة السرية , و علشان اعمل العاده السريه لازم اكون مستثير و ده من خلال مشاهده الصور الاباحيه او الافلام الاباحيه او حتي تخيل مشهد معين في خيالي .
خلصت الفتره الاعداديه و خلصت الفتره الثانويه و انا كل يوم بعمل العاده السريه و ممكن توصل ان انا اعملها اكثر من مره في اليوم بقت شئ اساسي في حياتي مثل الماء و الهواء.
بدأت ان انا ادخل علي المواقع الاباحيه سواء من محل الكمبيوتر او لما ابقي قاعد في البيت لوحدي .
ثالثا : مخاطر و اضرار العادة السرية
كان نفسي حد ينصحني بمشاكل العادة السرية سواء حد كبير او والدي قبل ما ادمنها لاكثر من 13 سنهبمارس الموضوع يوميا بمعني يوميا حياتي اتحولت من شخص منفتح الي شخص انطوائي حياتي مقفوله كلها حولين العادة السريةتفكيري متخد منه جزء كبير جدا لموضوع العاده السريه و مشاهده الافلام الاباحيه– دراستي بعد لما كنت بطلع من الاوائل في ابتدائي , بدأت ان مستويا يهبط بقيت حاسس ان تركيزي بيقل مش قادر اركز في المذاكره و ازداد الموضوع معايا في ثانوي و في الجامعه كمان .– صحيا كل الكلام الخاص بان العاده السريه بتسبب العمي و كسر الركب ده انا محصلش معايا تماما , وقرأت عنه انه غير صحيح علميا بالمره , رغم ان انا بمارسها بقالي سنين , و لكن الي حسيت بيه هو ( همدان الجسم باستمرار ) تحس كانك جسمك واقع كده و مفيش فيه صحه , الركب مش ماسكه نفسها و مع التقدم في السن و كثره الممارسه ساعات و انت بتمشي تحس كان ركبك سايبه بمعني الكلمه و تحس كانك هتقع , حاجه تانيه هيا البروستاتا الموضوع ظهر معايا لما كنت في الجامعه لما بدأت احس بالم في منطقة المثانه و لما كشفت لقيت عندي احتقان في البروستاتا و قالي الدكتور ان ده بسبب كثره ممارسه العاده السريه و ان انا لما كنت بعمل العاده كنت لما السائل هينزل كنت بمنعه علشان اطول مده الموضوع وده سببلي مشكله في البروستاتا و قعدت فتره كبيره اتعالج منها– من اكبر المشاكل الي حصلتلي بسبب العاده السريه و الي سببتلي مشاكل نفسيه بعد الزواج هو ان مكنتش حاسس في بدايه زواجي بالاستمتاع من العلاقه الجنسيه و ده بسبب ان انا كنت متعود ان الشعور ده بحسه و انا لوحدي , وكمان لما كنت بمارس العاده السريه كنت بحاول ان انا في بعض الاوقات انهي الموضوع بسرعه ( خوفا من ان حد يجي ) و الكلام ده هيعرفه الي مجرب الموضوع للاسف وده رغم ان انا بطلتها قبل الزواج بفتره بس برضه كان في تأثير , فمع زوجتي كان بيبقي عندي سرعه قذف و خروج السائل بسرعه وده كان مسبب مشكله ما بينا و الحمدلله اتعالجت من الموضوع بواسطه طبيب .– العامل النفسي اكثر حاجه اتأثرت فيها هو العامل النفسي , كنت دايما بحس ان انا معزول و ان انا حياتي كلها متعلقه في الموضوع ده , وان دايما عندي خوف , و علاقتي باسرتي كانت شبه مقطوعه والدتي و اخواتي في وادي و انا في وادي اخر .رابعا : علاج العادة السرية .
– انا كنت حاسس ان انا عمري ما هتخلص منها , ما هو لما اقعد اكثر من 13 سنه بعمل حاجه يوميا , و مكذبش عليكم كنت بحاول دايما ان انا تخلص منها و لكن كنت بحل الموضوع بشكل خطئ فكنت ابطل يومين اربعه اسبوع و ارجع اعملها تاني , لحد ما الحمدلله توصلت لان انا قدرت اتغلب عليها و ابعد عن الموضوع تماما .
اول حاجه لازم تعرفها ان ( العادة السرية ) هيا اسوء كابوس ممكن انك تعيشوا في حياتك و ان اضرارها الي انت مش هتحس بيها دلوقتي هتحس بيها قدام بس ساعتها هتبقي اتدمرت بمعني الكلمه و حياتك كلها اتدمرت بمعني الكلمه .
فلازم تخد القرار من نفسك انك تتحداها و تبطل الموضوع نهائيا انا مش هتكلم علي الموضوع دينيا انه حرام او غيره , انا هتكلم علي انه حاجه بتقضي عليك و لازم تتخلص منها .
اولا : كلامي ده للمسلمين لازم تتقرب من ربنا و تصلي , في شباب كتير هيقولوا ده كلام انشا و بتاع , اسمع مني بقي من واحد جرب حاجه الواحد مننا مهما كان بعيد عن ربنا بس بيبقي في حاجه جواه بتقول الحرام و الحلال و الصح و الخطأ و الخوف من ربنا , انت لما ترجع للصلاه و تبدء في الالتزام بالصلاه هتحس ان الايمان زاد من جواك و حبك لربنا و خوفك منه هيزيد جدا , لدرجه انك لو فكرت بس في انك تعملها هتبقي من حبك لربنا و خوفك منه هتبعد عنها , واحد هيقولي انا مش بعرف التزم بالصلاه لو صليت النهارده مش هصلي بكره و كده , هقوله الموضوع زيه زي ( العاده السريه ) , افهمني بس الترابط في ( العادة ) هنا انت اتعودت علي حاجه ادمنتها خلاص مبقتش قادر انك تبطلها بسهوله , زيها زي الصلاه لو جيت علي نفسك و قرصت نفسك انك تصلي مثلا لمده شهر كل يوم ال 5 صلوات , هقولك مبروك انت من بعد الشهر ده هتلاقي نفسك بمجرد ما الاذان هيأذن عقلك هيحرك جسمك مباشره ناحيه الوضوء و سجادة الصلاه , يعني هتقعد في الاول بتجاهد نفسك في الصلاه و بعد كده هتستمع بحلاوه الصلاه , طيب ايه علاقه الصلاه بان انا هبطل العادة السريه , هقولك تاني , اولا انت هتبقي بتتوضي 5 مرات في اليوم , و زي ما احنا عارفين العاده السريه بتبطل الوضوء , فانت هتبقي محافظ علي نفسك نضيف و لو فكرت فيها مش هتبقي عاوز تعملها و تاني حاجه ان الايمان جواك هيزيد فهتخاف انك تعملها علشان عارف ان ربنا شايفك و هتتكسف من نفسك .
ثانيا : متقعدش لوحدك بالله عليك ما تقعد لوحدك اوعي تقعد لوحدك , اساس العاده السريه في كلمه السريه في اننا بنبقي قاعدين لوحدنا عمرك ما هتعملها و في حد موجود , لازم بتبقي لوحدك و مختلي بنفسك , فانت لما تشغل وقتك و تبقي مع ناس و حتي لو شديت علي نفسك في الاول هتبعد عنها غصب عنك و مش بمزاجك و ده هيساعدك انك تبعد عنها تماما .
ثالثا : العب رياضه انزل الجيم , الواحد مننا و خاصه في فتره الشباب بيبقي عنده طاقه رهيبه لو انت مش بتلعب رياضه مش هتلاقي حاجه تخرجها فيها الا في موضوع العاده السريه , اما لو مارست رياضه نزلت روحت الجيم هتطلع الطاقه ديه في الرياضه , مش عاوز تروح الجيم العب في البيت ضغط العب عقله انزل اتمشي بهروله بسرعه المهم تطلع طاقتك .
رابعا : اتجوز ايوا زي ما سمعت كده لو قادر انك تتزوج اتزوج لو عندك 19 سنه و قادر علي الزواج تزوج , مش هدخل في جزء ديني برضه و مش هقول عن حديث الرسول صلي الله عليه و سلم ( من استطاع منكم الباءة فليتزوج ) , انا بقولك حاجه مجربه متعة الجنس ديه حاجه ربنا وجدها فينا علشان النسل و نعمر الدنيا و متعه بس بالحلال , فلو تقدر انك تتزوج امبارح قبل النهارده توكل علي الله فورا .
خامسا : الصوم
هو مكنتش بجربها بصراحه كتير بس سمعت النصيحه من حديث الرسول ايضا و جربته و لقيت ان فعلا طوال فتره الصوم كان في حاجه جوايا بتمنعي اني اعملها تمامااااااا بس طبعا كان الشيطان بيغلبني في بعض الاحيان و بعملها باقي اليوم بعد الصيام بس الموضوع ساعدني برضه ان بقيت اصوم الصبح و بليل ابقي مشغول او اخرج فبقيت اتحكم في الموضوع .
سادسا : وده عامل مهم اوي اوي اوي ( ابعد عنك اي حاجه تثيرك ) هتقولي ازاي ! هقولك المواقع الاباحيه نزل علي الكمبيوتر برنامج من برامج اغلاق المواقع الاباحيه زي Antiporn بتحمل البرنامج عندك و خلي اي حد عندك الي يبقي معاه كلمه السر و متعرفهاش انت بس ظبط الاعدادات بشكل صحيح و بس كده , مش هتعرف تفتح اي موقع اباحي علي الكمبيوتر ولو حاولت تحذفه او تعدله البرنامج هيطلب الباسورد وهو مش معاك , ولو انت عرفت في مره تحذفه المره الي بعديها هتكسل و مش هتعرف , حاول متتفرجش علي التلفزيون القنوات الي فيها عري او الافلام الاجنبيه لان كل ده هو الي هيدفعك انك تعملها و مع الوقت هتقدر انك تتحكم في نفسك تماما .
سادسا : ما بعد التخلص من العادة السرية .
– كفايه الراحه النفسيه الي انت هتحس بيها في انك مش بتعمل حاجه غلط , الاحساس ده لوحده حاجه لا توصف , هتحس انك مرتاح من جواك و مبسوط .
– علاقتي بالي حوليا اتحسنت كتير جدا لان انا علي عكس الاول مكنتش بخرج كتير وعلشان ابطلها بقيت انزل و اخرج و ازور ده و ده و انزل الجيم فاتعرفت علي اصدقاء كتير كويسين و ده حسن علاقتي بالناس .
– الزواج فرق معايا لاول مره كنت احس ان انا باستمتع بالموضوع في الحلال و انا مش خايف من حد و وانا عارف ان ربنا مش غضبان عليا .
– صحتي اتحسنت كتير جسمي شد و خاصه مع الجيم , جسمي بقي ماسك نفسه كده و صحتي بقت كويسه , لان انا اكتشفت ان العاده السريه بكثره بتخد من فيتامينات في الجسم و ده لا اعلم مدي صحته , بس الي حسه لا ان صحتي بقت احسن كتير .
>>>>>>>>>>>>>>رسالة اخيره – رساله الي اولياء الامور<<<<<<<<<<<<<<
خلوا بالكم علي اولادكم اغلي ما عندكم , بلاش تخلي ابنك او بنتك اصدقاء السوء هما الي يعرفوهم علي الحياه بشكل عام , بلاش تخلي اول حاجه يعرفوها يعرفوا بطريقة سيئه تلغبط افكارهم و تدمر حياتهم صاحب ابنك صاحبي بنتك عرفوهم علي الحاجه بالشكل الصحيح بلاش فكره اصل الكلام ده عيب اصل هما هيعرفوه لوحدهم , انسوا الكلام ده في المدارس الكلام ده مش بيدرس ولو بيدرس بيبقي المدرس او المدرسه مكسوفين وهما بيتكلموا فيه و بيختصروه و النهايه ان الولد او البنت بيعرفوا الكلام ده من طرق اخري و بيتسبب ليهم في مشاكل طوال حياتهم زي الي حصلي . – رساله الي اصدقائي لو كنت لسا جديد في موضوع العاده السريه صدقني الموضوع هيأثر علي حياتك و شخصيتك الجميله , وقدام هتتمني انك سمعت كلامي و نصائحي المجربه و بعدت عنه , اما الي بقالهم كتير بيعملوا الموضوع ده الحق نفسك الفرصه لسا موجوده مش هتبقي اكثر مني , هتقرب من ربنا يعني هتكسب اخرتك , هتكسب اصدقاء جدد , حياتك هتتعدل تماما , دراستك هترجع تركز فيها و هتبقي من المتفوقين وهتسعد اهلك , كل ده بقرار منك و بشويه خطوات هتعملها بس هتغيير حياتك تماما .
